ශ්‍රී ලංකාවේ මධ්‍යම පළාත් සමූපකාර සංවර්ධන දෙපාර්තමේන්තුවේ  නිල වෙබ් අඩවිය වේත පිවිසි  ඔබ සාදරෙයන් පිලිගනිමු.

ශ්‍රී ලංකා  ප්‍රජාතාන්ත්‍රික සමාජවාදී ජනරජයේ ආණ්ඩුක්‍රම ව්‍යවස්ථාවේ 13 වැනි සංශෝධනය යටතේ 1988 වර්ෂය් දී ශ්‍රී ලංකාව තුළ පලාත් සභා ක්‍රමය ස්ථාපිත කරන ලදී. එහි  ප්‍රතිපලයක් ලෙස මධ්‍යම පළාත් සභාවේ අමාත්‍යාංශ 5ක් ස්ථාපිත කර  ඇත. එහි ප්‍රධාන අමාත්‍යාංශය යටතේ සමූපකාර සංවර්ධන දෙපාර්තමේන්තුව මහනුවර, මාතලේ සහ නුවරඑළිය යන පරිපාලන දිස්ත්‍රික්ක  තුන මූලික කරගනිමින් කටයුතු කරනු ලැබේ.

මධ්‍යම පළාත තුළ සමුපකාර ප්‍රතිපත්ති හා සාරධර්මවලට අනුකූලව සමුපකාර ව්‍යවසාය ප්‍රවර්ධනය කිරීම සදහා ව්‍යවස්ථාපිත වගකීමි ඉටුකරමින් සමුපකාර සංවිධානවල යහපාලනයක් ස්ථාපිත කිරීම උදෙසා සවිමත් නායකයෙකු, උපදේශකයෙකු , සහායවන්නෙකු, සමිබන්ධීකාරකවරයෙකු සහ මග පෙන්වන්නෙකු ලෙස කටයුතු කරමින් යහපාලිත සමුපකාර පද්ධතියක් ස්ථාපිත කිරීමට කටයුතු කිරීම.

සෑම වර්ෂයකම ජූලි මාසයේ පළවෙනි ශනිදා එළඹෙන ලෝක සමූපකාර දිනයට සමගාමීව ශ්‍රී ලංකාවේ සමරන සමූපකාර දිනය ඔබටත් මටත් සුපුරුදු ලෙස එළඹෙන්නෙකි. නමුත් එම එළඹෙන දිනය වඩාත් සුවිශේෂී වීමට නම් අපි ගතවූ වර්ෂ සියයකට අධික කාලයකට වඩා යම් පියවරක් ඉදිරියට තබා තිබිය යුතුය. මේ සම්බන්ධයෙන් සලකා බැලීමේදී සඳහන් කළ හැක්කේ අතීතයේ එක්තරා කාලයක එලෙස වර්ධනය වෙමින් පැවති සමූපකාර ව්‍යාපාරය ලෝකයේ හා දේශීය ආර්ථිකයේ පරිවර්තනයක් සමඟ යම් පසුබෑමටකට ලක්වූවත් එතුලින්ම ලැබුණු පන්නරය ඔස්සේ නැවතත් නව පනක් ලැබී ඇති බවයි. විශේෂයෙන්ම විවෘත ආර්ථික රටාවන් ඔස්සේ ප්‍රතිලාභ විඳින ගමන්ම එහි ඇති අවගුණද ජනතාවට තේරුම් ගැනීමට හැකිවීම සහ විශේෂයෙන්ම ජාතික ව්‍යසන, වසංගත , ආර්ථික අර්බුද වැනි කාලසීමාවල එම ආර්ථික ක්‍රමයෙන් නිසි විසඳුම් නොලැබීම මෙයට ප්‍රධාන හේතුවක් ලෙස දැක්විය හැකිය.

එලෙසම යම් රටක් සංවර්ධනය වීමේදී ප්‍රධාන වශයෙන්ම බලපාන සහ සංවර්ධනයේ මිම්මක් ලෙස ගන්නා තිරසාර සංවර්ධනය මෙන්ම අධ්‍යාත්මික සංවර්ධනයට අප සමූපකාර ව්‍යාපාරය වෙත නැවත යොමු විය යුතුමය. සැබවින්ම තිරසාර ග්‍රාමීය සංවර්ධනය යනු එයයි. මෙම අදහස සම්පූර්ණයෙන්ම නොවූවත් එහි ඡායාමාත්‍ර වශයෙන් හෝ ජනතාව අතර මේ වන විට පැතිරෙමින් පැවතීම සලකා බලන විට ඉදිරි කාලය තුළ එය ජනතාව ගේ අත්‍යාවශ්‍ය අංගයක් වෙනු ඇත. එදිනට සමූපකාර ව්‍යාපාරය ජනතාවට සමීප වීමට තරම් ලඟින් සිටීමට නම් අප එය ඒ සඳහා සුදුසු මට්ටමෙන් සකස් කර තිබිය යුතුය.

වර්තමානයේදී මධ්‍යම පළාත් සමූපකාර දෙපාර්තමේන්තුවේ ප්‍රධානතම අරමුණ වන්නේ එයයි. මේ තාක් කල් යම් යම් පසුබැසීම් වලට අලාභ ලැබීම්වලට, අක්‍රමිකතාවලට ලක්වී තිබුණු සමූපකාර සමිති නිසි මඟකට යොමු කර විගණනය, විමර්ශනය, අධීක්ෂණය ඔස්සේ විනිවිදභාවයකින් යුතු සමස්ථ සමූපකාර සමිති ව්‍යාපාරයක් බවට පරිවර්තනය වීම ආරම්භ වී තිබීම අප පසුගිය වර්ෂ තුළ ලබාගත් ජයග්‍රහණයයි. විශේෂයෙන්ම සමිති බල ප්‍රදේශ විධිමත් කර ගනිමින්, සමිති සාමාජිකයන් වර්ධනය කර ගනිමින්, සෑම පවුලක්ම සමූපකාර ව්‍යාපාරයේ සාමාජිකයකු කිරීමේ පස් අවුරුදු සැලැස්ම යටතේ මේ වන විට සමූපකාර ව්‍යාපාරය නැවතත් ජනතාව ගෙ ව්‍යාපාරය බවට පත්වෙමින් තිබේ. තමන්ගේ ගමට තමන්ගේම වෙළඳ සැලක්, තමන්ගේම බැංකුවක්, තමන්ගේම නිෂ්පාදන ව්‍යාපෘති ජාලයක් යන අදහස ජනතාව වෙත ලබාදීමත්, ප්‍රතිලාභ ජනතාව වෙත ලබාදීම පහසුකරවීමට තොරතුරු තාක්ෂණය මත පදනම් වූ විසඳුම් ලබාදීමත් පසුගිය වර්ෂ කිහිපයේ සමූපකාර දෙපාර්තමේන්තුවේ ප්‍රධාන ඉලක්කයක් වූ අතර එය ඉදිරි පස් අවුරුදු කාලය තුළ යථාර්ථයක් බවට පත්වනු ඇත. අතරමඟ නවතා දැමී තිබුණු සමූපකාර සමාජයක් ගොඩනැගීමේ විප්ලවය ඉතාමත්ම නුදුරු දිනකදී සාක්ෂාත් වී එහි ප්‍රතිලාභ ලබාගත් සමූපකාර සමාජයක්ම තුළින් සංවර්ධනය වුනු ශ්‍රී ලංකාවක් නුදුරු අනාගතයේම දක්නට ලැබේවායි ප්‍රාර්ථනා කරමු.

අමිල නවරත්න
සමුපකාර සංවර්ධන කොමසාරිස් හා සමිති රෙජිස්ට්‍රාර්
මධ්‍යම පළාත